هو ايه اللى خلاك تسيب صيدلة بعد ما وصلت انك بقيت مدييييير رقابة وتتخصص فى القرآن ؟
عايز تعرف الإجابة صحيح؟
أيوة…ودلوقت حالا من فضلك
اللى خلانى أسيب كل حاجة واتجه للقرآن بس
انى ملقتش نفسى غير معاه
مفيش حاجة حققتلى الأمان غيره
ومفيش حاجة حسستنى انى وصلت لحقيقة نفسى الا القرآن
مبرتاحش الا معاه
ولما الدنيا بتضيق بلاقيه جنبى أجمل صديق
وأسعد أوقاتى لما بكون براجع…. أو بحفظ برواية قرآنية جديدة
أيوة بس ده كلام مش عملى اوى ..مممم…مش حاسس ان دى اجابة مقنعة🧐
عايز الاجابة فى كلمة واحدة؟
يا ريت
هرم ماسلو
مين أصلو ده؟
هههه.😂😂😂..اسمه ماسلو
وده عالم نفس درس تطور النفس البشرية واحتياجاتها أثناء وبعد الوصول لكل مرحلة
حسب العالم ده
الانسان منا بيدور على اشباع الاحتياجات الأساسية الاول زى الأكل والشرب والنوم
اذا تحققت الاحتياجات دى بيدور عاللى بعده
وهو الاحتياج للأمان
الأمان الوظيفى
الأمن الأسرى
الأمن الصحى
أمن الممتلكات
فإذا أحس بالأمان
بدأ يخرج من ذاته الى المجتمع اللى حواليه
ويحقق الاحتياجات المجتمعية
زى الاحتياج للصداقة والاحتياج لتكوين أسرة
اذا تحققت الاحتياجات دى
وعاش فى مجتمع بيسعد فيه بالعلاقات الجميلة مع الآخرين
بدأ يبحث عن الاحتياج للتقدير
تقديره لذاته أولا واللى عمله طول حياته
بدأ يشبع احتياجه للثقة ويثق أكتر فى نفسه والآخرين
يبدأ يبحث عن انجازات أكبر
ويحقق احتياجه للاحترام من الآخرين
وأنا وصلت لده والحمد لله
لكن دايما كنت حاسس ان فيه حاجة ناقصة مش عارف هى ايه
عرفت من خلال هرم ماسلو ان الاحتياج الأخير ده اسمه
الحاجة لتحقيق الذات
ودى من الحاجات العليا واللى بتتحقق من خلال تعظيم استخدام الإنسان لقدراته ومهاراته عشان يوصل لحقيقة حياته
ودى كانت الحاجة اللى نقصانى
الاحتياج ده محستش انه اتحقق لى إلا مع القرآن
بتمنى أعيش عشانه
وأخده معايا وأنا ماشى
بتمنى يتقال لى
اقرأ وارق ورتل كما كنت ترتل فى الدنيا
بتمنى أقراه فى الجنة
وأوصل بيه إلى أعلى الدرجات
أنا لقيت فى القرآن تحقيق ذاتى
وانت كمان ممكن تقول لى
القرآن بالنسبة لك بيمثل ايه؟
