دايرة التأثيرودايرة الهموم
مبدأ هام لحفظ القرآن
كيف تزيح همك وتعيش حياة سعيدة؟ 😍😍
فيه مبدأ مهم جدا فى الحياة عامة وفى القرآن خاصة اسمه دايرة التأثير ودايرة الهموم
وعشان أوضح لك الصورة بسهولة
هحكيلك قصة محمد
محمد رب أسرة بسيط بيشتغل ليل ونهار عشان يكفى أسرته
أسرته المكونة من ولدين وبنت وزوجته
محمد رغم انشغاله بهدف نبيل انه يكفى أسرته
إلا انه كان عنده حلم
حلم انه يحفظ القرآن
وانه يخلى أولاده وزوجته كمان يحفظوا
حاول قبل كده مع أولاده
وأرسلهم للمسجد القريب
لكن بمجرد انتهاء أجازة الصيف
كان الوضع يرجع إلى ما كان عليه
وتنقطع علاقة أولاده بالقرآن
محمد جالى من فترة عايز يحفظ
وبعد اجتياز اختبار التجويد
لقيته بيقولى
ممكن أتكلم مع حضرتك شوية؟😔
سؤاله كان فيه مسحة حزن واضحة
استغربت شوية
لأن عادة لو ليه أسئلة عن البرنامج كان سألها قبل الاختبار
طردت أفكارى بسرعة وقلت له : اتفضل 🤔
بدأ محمد يحكى لى ازاى انه نفسه أولاده يحفظوا القرآن
وازاى هو حاول معاهم قبل كده بالطرق التقليدية
لكن النتيجة مش عجباه
هو بيتمنى انهم لا تنقطع علاقتهم بالقرآن
نفسه انهم يعرفوا قيمة القرآن
ويحملوه فى صدورهم
نفسه انه لو أخطأ فى آية
أولاده يردوه
نفسه ان أى حد من أولاده يقدر يقف إمام بيهم
وبعدين سألنى
يا ترى تنصحنى أعمل ايه معاهم؟
مرت لحظة من الصمت
فكرت فى الإجابة يمكن أكتر من دقيقة وهو منتظر
إلى أن قلت له
اللى ميقدرش يساعد نفسه…مش هيقدر يساعد غيره
وبدأت أشرح له مفهوم دايرة التأثير ودايرة الهموم
شرحت له
ان تحركه خطوة نحو حفظ القرآن ده من ضمن دايرة تأثيره
وانه لازم يبدأ بنفسه أولا ويبص فقط للى يقدر يعمله
ولما يبدأ بنفسه
دايرة تأثيره هتتسع
وهيقدر يأثر فى دايرة الهموم بدلا من تأثره بها
شرحت له ان اللى بيحكيه عن أولاده يقع ضمن دايرة الهموم
هو ميقدرش يتحكم فى تصرفاتهم
لكن يقدر بسلوكه (دايرة التأثير) يكبر تأثيره عليهم ويغزو (دايرة الهموم)
محمد سمع الكلام
بدأنا الحفظ
وبعد شهر
محمد أثناء اختباره على ما تم حفظه
لقيته بيقولى
أولادى الصبيان نفسهم يحفظوا
ابتسمت 😄 وقلت له ايه اللى حصل؟
قال لى
لقونى كل يوم برجع من الشغل تعبان كالعادة
كنت قبل كده بتغدى وانام شوية
دلوقت بقوا يشوفونى بتغدى وأقعد وسطيهم
عشان أحفظ الورد
كانوا بيبصولى بنظرات مختلفة وأنا أقرأ بصوت عالى
نظرات اعجاب…تعجب…انبهار
لحد امبارح لقيت ابنى الكبير جايلى
بيقولى بابا…أنا عايز أحفظ زيك
عايز أحفظ القرآن بدون نسيان
واكتشفت انه اتكلم هو وأخوه مع بعض
ونفسهم يحفظوا زيى
فضلت أدارى ضحكة الفرحة 😄😄😄👏👏👏
قال لى
افتكرت كلمتك على طول
اللى ميقدرش يساعد نفسه مش هيقدر يساعد غيره
بعد فترة لقيته بيكلمنى على غير موعد
بيقول لى
ان بنته الصغيرة غارت من اخوتها ونفسها تحفظ
وان زوجته قالت له
انه مينفعش كلكم تحفظوا وأنا لأ 😆😆😆
محمد بقى انسان سعيد مستمتع هو وأسرته بالقرآن
وكل يوم بيقربهم من حلمهم فى حفظ القرآن
بعد فترة سألته
عامل ايه مع أسرتك دلوقت؟
بدأ يحكى لى
انه بيستشعر معنى الحديث لأول مرة
“خيرُكم خيرُكم لأهلِه وأنا خيرُكم لأهلي”
الراوي : عائشة أم المؤمنين | المحدث : ابن جرير الطبري | المصدر : مسند عمر | الصفحة أو الرقم : 1/408 | خلاصة حكم المحدث : إسناده صحيح
قال لى كمان ازاى انه كان قبل كده بيقعد هو والأسرة
ويلاقى الكل مشغول بموبايله
ومكانوش بيتكلموا مع بعض الا قليلا
وازاى دلوقتى الحال اتبدل الى جلسات
بيسألوه فيها عن معنى آية
أو ايه مناسبة نزول الآية دى
وازاى بقوا بيستمتعوا بالصحبة
من غير ما يطلب منهم ترك الموبايلات ولا الألعاب
وأد ايه كان بيتعب معاهم عشان يسيبوها قبل كده
ازاى بقوا بيحكوله حاجات بتحصل معاهم فى المدرسة
وبيسألوه يتصرفوا ازاى؟
بقوا يتكلموا بانتظام
حتى هو وزوجته علاقتهم اتغيرت
بقوا يتكلموا مع بعض أكتر
بقت زوجته تحكى له عن هدوء الأولاد وتغير سلوكهم للأحسن
بقت تحكى له عن تغير سلوك الصبيان مع أختهم الصغيرة
ازاى بقوا أحن عليها
وبيسمعوا الورد ليها وبيصححوا لها
ازاى بقوا يساعدوا والدتهم فى وضع الطعام بدون مناهدة
ازاى بقوا يروحوا على سريرهم وقت النوم بدون زعيق كل يوم
مبقوش يتعبوها فى الصحيان الصبح للمدرسة
بقت زوجته تحكى له عن ابنها الكبير اللى فى سن مراهقة
انه ساب صاحبه اللى بيقول ألفاظ خارجة
واللى هى بنفسها طلبت منه كذا مرة يسيبه من غير فايدة
عائلة محمد بقت بتستمتع بوجودهم مع بعض
وكل ده بدأ بدايرة التأثير
محمد عمل خطوة صغيرة لكنها خلت تأثيره يكبر على اللى حواليه
انت كمان تقدر
والبداية من هنا
